Hər bir insan təhsilini bitirdikdən sonra karyera qurmağı düşünür. Amma bəzən yanlış fikirlərlə addım atır ki, bu da onun ilk karyera pillərində nöqsanlar buraxmasına gətirib çıxarır.Bu yanlış fikirlərlə sizi tanış edirik:
Heç vaxt iş yoldaşlarından seçilmə: Yanlış fikir.
Bütün insanlar işləyir,amma bütün insanlar karyera qurmurlar.Əgər heç nə ilə digərlərindən seçilməsəniz,sizi nəyə görə işdə qabağa çəksinlər ki? Ona görə də bu cür deyimlərlə razılaşmayın.Uğur qazanmaq üçün özünüzü təkcə mütəxəssis kimi deyil,həm də şəxsiyyət kimi göstərməyə çalışın.
İşdən sonra qal və bütün gücünlə işlə: Yanlış fikir.
Əsl həqiqətdə bu ondan xəbər verir ki,siz öz işinizin öhdəsindən gələ bilmirsiniz.Əlbəttə,bəzən elə şərait olur ki,işdən sonra qalmaq və hətta bazar günü də işə çıxmaq vacib olur.Amma bu sizin üçün bir qaydaya çevrilməməlidir.
Həmkarlarınla dostluq elə: Yanlış fikir.
İşdə işləmək lazımdır,dostluq eləmək yox.Gözəl və bərabər münasibətləri bütün işçilərlə saxlasanız,heç də pis olmaz.Amma kiminləsə səmimiyyət baxımdan yaxın münasibət qurmadan öncə yüz dəfə ölçüb,bir dəfə biçsəniz, daha məsləhətlidir.Əsl həqiqətdə, yeni kollektivdə insan özünü xeyirxah və səmimi bir insan kimi nümayiş etdirməyə çalışır.Siz də buna çalışın,amma həddi aşmayın və həmişə ehtiyatlı olun.
Qətiyyən işini dəyişdirmə: Yanlış fikir.
İndi bir çox idarələrdə,şirkətlərdə kimisə işə götürərkən,uzun müddət bir yerdə işləyənlərə daha ehtiyatla yanaşılır,nəinki iş yerini daha tez-tez dəyişənlərə.İşin yerini,hətta ixtisasını dəyişmək insanın biliyini,təcrübəsini artırır və yaxşı tanışlar əhatəsini genişləndirir.
Rəhbər həmişə haqlıdır: Yanlış fikir.
Bəzən rəhbərlərlə mübahisə etməyə lüzum yoxdur.Əgər o, açıq-aşkar şəkildə inad edirsə,onda çox da dərinə getmədən onunla razılaşmaq,amma bacardıqca öz bildiyin kimi hərəkət etmək lazımdır.Qalibi heç vaxt mühakimə etmirlər.Amma yadınızda saxlayın; bunun üçün mütləq qalib gəlməlisiniz...
Korrektor:Əhmədova Sevinc