Eynşteyndən Həyat Dərsi Alın!

0
4647
Eynşteyndən Həyat Dərsi Alın!

Bəzən şəxsi həyat təcrübəmiz uğur qazanmağımız və ya ayaqda durmağımız  üçün yetərli olmaz. Təcrübəli şəxslərin məsləhətlərinə ehtiyac olar. Alim olmasanız belə, bir alimin şəxsi təcrübələri əsasında yaratdığı "Həyat dərsləri" siyahısına siz də müraciət edə və öz həyatınıza dair bir ipucu yaxalaya bilərsiniz.

1. "Əgər siz öz fikrinizi 6 yaşlı uşağa izah edə bilmirsinizsə, bu o deməkdir ki, siz öz fikirlərinizi hətta özünüzə çatdırmaq iqtidarında deyilsiniz" - Albert Enşteyn.

Hər hansı bir işin strukturunu bilmədikdə o işin icrasına başlamaq çətin olur. Ömrünüz boyunca tanıdığınız ən yaxşı müəllimlərinizi yadınıza salın. Öz fikirlərini sizə çatdırmaq üçün sadə danışıq dilindən istifadə etdiklərini xatırlayın.

2. "Yaradıcılıq potensialı "yoluxucu"dur, onu sirayət etdirin" - Albert Enşteyn

Digər insanları sevdikləri işlərlə məşğul olmağa həvəsləndirin. Beyninizə gələn yaradıcı ideyalar vasitəsilə ətrafda "domino effekti" yarada bilərsiniz.

3. "Həyatda səhv etməməyin yeganə yolu yeni ideyaları gerçəkləşdirməkdən və risk etməkdən uzaq durmaqdır" - Albert Enşteyn

4. "Bir insan cəhd etməkdən yorulmadıqca məğlub olmuş sayılmaz" - Albert Enşteyn

Eynşteyn həyatının böyük bir hissəsini fizika nəzəriyyələrinə həsr etmişdir. Hər bir insan öz üzərində işləməli və heç bir uğursuzluğa baxmayaraq hər zaman problemlərini həll etmək üçün çalışmalıdır. Çünki insan səhv etdikdə deyil, cəhd etməkdən yorulduqda həyatda məğlub sayılır.

5. "Heç vaxt gələcək haqqında düşünmürəm, çünki tez ya gec gələcək" - Albert Enşteyn

Yalnızca gələcəyi düşünməklə və bu düşüncə ilə addımlar atmaqla uğur əldə etmək mümkün deyil. Hər anın öz hökmü var. Bugünü yaşayın və gələcəyə dair narahatlıqların sizi ələ keçirməsinə izin verməyin.

6. "Mənim ixtiralarım qeyri-adi düşüncənin məhsuludur" - Albert Enşteyn

Hər şey insanın öz çərçivələrini qırması, öz qeyri-adi düşüncələrini qapalı qaldıqları qutudan azad etməsi və bu qeyri-adi düşüncələri reallaşdırması ilə başlayır. Qaydalara uyğun olaraq atdığınız addımlar sizə ənənəvi nəticələr qazandırır. Ənənəvi olmayan nəticələr əldə etmək üçün ənənəvi olmayan düşüncə tərzinə sahib olmaq lazımdır.

7. "Təxəyyül tədqiqatın ən yüksək zirvəsidir" - Albert Enşteyn

"İnsan xəyal edərkən sanki rəssama bənzəyir. Xəyal gücü ilə bütün daxili aləmini əks etdirir. Təxəyyül bilikdən daha vacibdir. Bilik məhduddur. Lakin təxəyyül bütün dünyanı əhatə edəcək qədər genişdir." - Albert Enşteyn

8. "Yalnız absurd addım atan şəxslər mümkünsüzə nail ola bilərlər" - Albert Enşteyn

Başqalarına cəfəngiyat kimi görünən fikir sizin məqsədiniz ola bilər. Bu məqsədə çatmaq üçün siz bütün riskləri nəzərə alıb addım atırsınız, sonda mümkünsüzə nail olmaqla qeyri-adi nəticə əldə edirsiniz. Bununla siz başqalarına maneə və ya imkansız  kimi görünən bir işin öhdəsindən gəlmiş olursunuz.

9. "Gündəlik həyatımızdan da bildiyimiz kimi biz ilk növbədə digər insanlar üçün yaşayırıq. Bizim xoşbəxtliyimiz onların təbəssümündən və rifahından asılıdır" - Albert Enşteyn

10. "Həyat başqa bir insan üçün yaşamadığımız təqdirdə dəyərli deyildir" - Albert Enşteyn

Əgər ətrafınızdakı insanları həyatanızın ən önəmli insanları hesab etsəniz, bu zaman onlar sizi yüksək qiymətləndirəcək və sizin onlara göstərdiyiniz qayğını anlayacaq. İşinizin çox olduğu günlərdə də ətrafınızdakı insanlara diqqət göstərməyi unutmayın. Onlara sizin üçün dəyərli olduqlarını hiss etdirin. Yanınızda olduqları üçün onlara təşəkkür edin.

11. "Tələbə içi doldurulmuş bir konteyner deyil, yola işıq saçan məşəldir." - Albert Enşteyn

Öz fikirlərinizi digər insanlarla paylaşın. Bəlkə də bu fikirlər digər insanlarda bir həyat qığılcımı yarada bilər və bununla onlar hər zaman reallaşdırmaq istədikləri bir planın icrasına başlaya bilərlər. Fikirlərinizi və biliyinizi heç kimlə paylaşmayıb yalnız özünüz üçün saxlasanız, bu zaman digər insanlara bir faydanız olamayacaq.

12. "Hər zaman sizə görə doğru olanı edin. Bu addımınız bəzilərini sevindirəcək, bəzilərini isə təəccübləndirəcək." - Albert Enşteyn

Yolayırıcına gəldikdə və ya beyniniz sizdən bir qərar tələb etdikdə, bu zaman sizə görə doğru olan qərarı seçin. Qərar verərkən digər alternativin daha asan olduğu hissinə qapıla bilərsiniz, lakin seçdiyiniz qərarın sizi gələcəkdə daha böyük imkanlarla təmin edəcəyindən və doğru seçim olduğundan əmin olsanız, bu addımı atmalısınız deməkdir.

 

Korrektor: Əliyeva Aynur

ŞƏRH YAZIN